BAnD INFLUENCE

*** Posted April 18, 2007 , Wednesday, as my entry for Maria Eleanor Elape Valeros' HUGYAW FAN ZONE (BAnD INFLUENCE) in Banat News. Influencing every Cebuanos to contribute to the fast spread of Bisaya Rock in Cebu, showing the simple way of patronizing our own products of talent and creativity.



"...liko's tuo padung Jones Avenue, you gotta say it cool..." Mao kini ang lyrics sa kantang "Lakbay-Lakbay" sa Missing Filemon nga akong nadunggan sa jeep nga akong gisakyan sayo sa buntag padung sa trabahoan. Gisundan dayon kini ug "...ang among balay, ang among atop...kay ang atong kinabuhi lingin..." ug ginuntan sa "...oh estambay! Dili mangita'g away..."

Hilom akong nakatawa ug nabuhian nako ang usa ka timi nga pahiyom nga mikulit sa akong bayhon pagkadungog sa maong mga kanta, samtang nakita usab nako ang konduktor sa jeep nga bibo kaayong nisabay pagkanta.

Dili na gayod ikalimod ang dali nga pagsikat sa lahi nga genre sa musika, lumad gikan sa Sugbu- ang BISROCK. Duha pa lang ka tuig ang paghari niini dinhi sa dakbayan apan nakuha na niini ang interes ug ang kasing-kasing dili lang sa mga Sugbuanon kundili lakip na usab ang ubang mga tawo sa laing dapit.

Ang pagsugod ug ang kalamboan sa Bisrock akong nasaksihan. Nagtungha pa lang ako sa kolehiyo sa dihang unang migimaw ang mga matawag nga pioneering bands sa Bisrock- Aggressive Audio, Missing Filemon, Scrambled Eggs, Jimmycycle, Phylum ug daghan pa. Samtang naa kami sa akong suod nga higala sa pagkanta-kanta. Magkataw na lang sa maong mga nga nag-iyahay og pangyamiid gikaluhaan sa kahibulong kung unsang matanga sa kanta ang among gikalingawan. Sila igo lang pud sa pagpangutana, "Unsa nang kantaha, oy? Mugna-mugna sad mo dah!"

Gitubag sad namo sila sa pag-ingon, " Bisrock ni oy. Di mo maminaw ug Smash?" Apan bisan og kamo mapasigarbohon ug malipayon sa kanta nga among gikalingawan pag-ayo, sakit gihapon paminawon ilang mga pagsaway ug pagbiay-biay nga ang matang sa musika nga among gikalingawan nagpaila lang kuno sa among pagka-Bisayang dako. Nakatuaw ako, "Unsa man diay ta? Amerikano ug amerikana?"

Diha'y mga higayon nga daw sama ako sa bata nga gustong magpalaban sa mga susama nakong mga Bisrockers. Apan kadtong tanan wala nakababag sa pagpadayon nako pagtamod sa Bisrock. Mga CD collections, pagsaulo sa kanta, pagsaksi sa mga konsiyerto nga panagsa rang mahitabo ug ang wala'y palta nga pagpaminaw sa Smash FM. Matag higayon nga ako maka- "hearing sa mga umaabot nga konsiyerto sa among tulunghaan, sa hilom ilakip nako sa akong pangaliya ang aduna'y Bisrock bank nga motukar o kaha school band nga mo-"cover" og Bisrock nga mga kanta. Apan daw sa dakong sungog, kanunay usab nga mahimugso and kapakyasan.

Nilabay ang pila ka mga buwan ug nakahuna-huna na lang sad ko nga mobalik sa klase sa musika nga ako gyud nga namat-an - ang reggae. Apan bisan pa man sa akong nakab-ot nga desisyon, dili gihapon nako malikayan nga ang akong dunggan daw sandayong nga mosawod sa mga huning gipahaom sa Bisrock nga paningog. Hangtod nga inanay nakong namatngonan nga hinay-hinay nang misulbong ang Bisrock ug ingon man may mga kanta na usab nga Binisaya nga gipahaom sa paningog nga reggae.

Ang akong kasing-kasing misamot pagpitik alang sa Bisrock labi na nga nahimamat nako ang bagang duot sa mga sakop sa Bisrock Community nga sama kanako mahiligon usab sa maong matang sa musika. Usab nahibaw-an nako nga ang ubang mga banda nga sa una kantang langyaw ang tirada, karon nag-iyahay na'g mugna og mga kanta sa kaugalingon natong pinulungan. Sa mga kabalayan sa akong mga higala, kabahin na gyud ang mga Bisrock CDs. Sukwahi kaniadto nga wala gyu'y usa nga nagtipig.

Gipangandoy nako sa una nga hinaot ang akong mga kauban sa tulunghaan makasabay sa akong "mugna-mugna" nga kanta. Ug karon natuman na sa kataposan. Labaw pa ang gihatag nga katumanan kay dili lang ang akong mga kauban sa tulunghaan ang nakasabay. Lakip na karon ang akong mga kauban sa opisina ug ang uban sa nagkadaiyang lugam diin naabot ang pagsibaw sa Bisrock. Nadoble ang akong pagmaya sa dihang nasayran nako nga nagkadaghan na usab ang mga reggae bands nga nakahukom nga palamboon ang lumad nga pinulongan pinaagi sa musikang reggae.



POSTED EXACTLY AS HOW IT APPEARS IN BANAT NEWS.